2008年1月17日星期四

悼純味公仔麵

好肚餓。打開食物櫃,唔係「辛拉麵」就係「出前一丁」麻油麵。真係有點厭。

其實咁多種出前一丁,分別只在於那包味粉上面。而我又覺得那些蝦味牛肉味雞味海鮮味始終無乜咁好食,所以平時買出前一丁都只買麻油味,貪佢夠香。

就我所觀察,一般茶餐廳用的即食麵,無論任何牌子,都好似同零售用的不同(這純屬猜測,如有錯請指正)。前者唔知係咪在出廠前用油炸過,所以個 texture 同家用的有點不同。而後者唔知係麵質抑或烹飪功夫的關係,總覺得無街外邊的咁好食。另外,雖然出前一丁唔難煮,但係要煮得唔好太淋或大硬,仍然要小小心機。

所以我喜歡煮辛拉麵,因為貪佢易煮。基本上,辛拉麵好快熟。而且佢對烹煮的時間亦好 tolerant,即使煮多了點點時間都唔係問題。當初辛拉麵登陸香港的時候(好似係九七年前後的事),其實都幾革命性。因為佢係市場上唯一一隻辣麵。由當時起,我就一直有買辛拉麵來看屋。

不過講到最好食的即食麵,莫過於已經停產的「純味公仔麵」。佢有雞蓉味同牛肉味(好似重有另一種味道,不過我無印像),而每包麵都有一包醬料同一包調味粉。面世時以無味精作招徠。這些調味料真的好好味,好到我每次食完麵之後都會成碗湯飲埋。而且唔知係唔係心理作用,總覺得純味公仔麵的口感比其他的即食麵好。可惜佢可能賣得太貴(比一般的出前一丁麵或公仔麵貴四至五成;比起褔麵就貴更多),以至銷路很差。在永南食品給日清收購之後,就沒有再生產了。

沒有留言: