2009年3月16日星期一

星期一又雜炒

「攝」衫 = 港男?
昨晚「星期日檔案」講「港男」,不但水過鴨背,還有嚴重謬誤(「港男」不同「電車男」)。「港男」這個題目我無深入瞭解,所以唔講嘞,有興趣者可以睇一睇呢篇寫得好好嘅文章。這裏想講的是「攝」衫。

節目中有個女仔彈 D 港男攝衫,呢點我唔同意。小妹妹,攝唔攝衫,同係咪「港男」根本無關。你試下去 D 遊客區打個轉,唔少鬼仔都係攝衫嘅。就算你上 D 時裝網站,佢地 D models 一樣有攝衫。例子:


(Left: Viktor & Rolf; right: Graniph)


(Left: H&M; right: Calvin Klein)

以為唔攝衫先至型,根本係香港人嘅誤解。香港人 D 衣着品味本來就好奇怪。你睇 D 外國舊片,雖然內裏角色的衣着不合今日潮流,但係如果照住着衫,人地都最多只會覺得奇特,唔會覺得醜。但係你睇下以前 D 香港電視或電影?D 衫簡直嚇死人(髮型都係),我都唔知今日有邊個夠膽着佢地出街。

至於攝唔攝衫,根本要睇衫同睇人,無得一概而論,不過我覺得仍有兩點大原則比較穩陣:一、着類似西裝褸嘅外套,無論個款幾 casual,入面嘅 shirt 或 tee 攝入褲度應該都 OK,反而 "fea" 出來就好難講;二、校服幾時都要攝,呢個唔止係校規問題,而係校服根本係設計到攝衫先好睇。唔攝衫?或者同輩因為扭曲咗嘅品味所以覺得你好型,但係你試下中學畢業之後睇返 D 相吖,簡直「娘」到嘔。

電子病歷
報章今日重提政府擬耗資十一億元推行的電子病歷計劃。有立法會議員擔心系統保安不週,容易洩漏病人私隱,不過我覺得最大的問題反而是病歷的格式有否足夠彈性迎合不同醫生的需要。

我不明白為甚麼搞一套電子病歷系統要十一億元那麼多,要公、私營醫療機構可以互通病歷,當然不簡單,單是令病歷本身的格式(大概是某類 XML 格式)可以容納不同醫療器材輸出的資料,已經費心思,要設計一套既有彈性而又完備的病歷格式,更不容易。不過我最不明白的,是食物及衛生局似乎從無詢問一眾公家及私家醫生有甚麼要求。除非設計軟件者本身熟悉行內運作,否則無理由不先瞭解用家的要求。連 user requirements 都無,怎談 technical spec., 開發時間以至開發成本?

從網上搜尋,現時歐、美好像都有一些非牟利組織制訂不同的電子病歷格式標準。政府究竟希望制訂自己的標準,還是依從大國的格式?若是前者,我想知道政府覺得外國的標準有何不適用的地方;若是後者,我更想不出整個計劃為甚麼居然要用十一億元。總覺得隨便將一大「舊」錢塞畀一些顧問公司才會如此誇張。

相關連結:
  1. 《星島日報》報道
  2. 《東方日報》
  3. Electronic medical record; Wikipedia
  4. (舊聞)香港醫院管理局:為電子病歷引入影像
經紀有權自行斬倉?
今晚無綫有個證監會特約的遊戲節目首播,有條問題問股票孖展客戶戶口不夠錢的時候,經紀可否自行斬倉。節目指答案為「可以」,並謂萬一戶口出現負數,經紀行有權向客戶追討損失云云。

喂,老友,經紀行好似唔同經紀噃,係咪有 D 嘢攪錯咗?

沒有留言: